"يا بني مالك؟ هتفضل عايش مكتئب كدة؟ يعني الزعل دة هيفيدك؟، طب يعني فيه حاجة هتتغير؟، ما اللي سابك سيبه، واللي خانك انساه، وعيش حياتك عادي.. ماتفكرش فيه.. يعني هو بيفكر فيك دلوقتي ولا حياته وقفت عليك؟ ماهو عايش حياته عادي أهوه وانت ولا في دماغه.. وبكرة يحب غيرك وينسى أصلاً إنه عرفك في يوم من الأيام.. أرجوك بقى let it go..".
كلام زهقت من كتر ما باسمعه.. بس اللي قالوه عندهم حق.. ماهو أصل مادام كل الناس بيكون رد فعلها بعد الفراق هو النسيان بكل بساطة تحت مسمى "كله بيعدّي والحياة مابتقفش على حد" هاستغرب ليه.. أنا اللي مختلف عنكوا.. أصلي مابحبش بسهولة.. وممكن أقعد سنين لحد ما أحب حد.. بس لو حصل وحبيت مش بيبقى حب إمتلاك.. لأ، دة بيبقى حب إحتلال.. بأحتل حياة اللي باحبه وباحشر نفسي في كل تفصيلة.. وعشان كدة ساعة الجلاء -قصدي الفراق- بيبقى الخروج من أراضيه من أصعب ما يمكن.. عارف إن أنا اللي غريب.. حتى من قبل الفراق وأنا بافكّر في حاجات مش بتيجي في دماغكوا، وباتضايق من حاجات لو انتوا مكاني هتعدّوها عادي ومش هتشوفوها مشكلة..
مثلاً يعني إيه أكون بحب حد وهو بيحبني، وألاقيه منزّل على فيس بوك صورة آسر ياسين وجنبها كلام عشق وقلوب عشان بيحبه أكتر مني؟
يعني إيه ألاقيه عامل check-in في مكان بدون مايستأذني قبل ما يروحه؟
يعني إيه ألاقيه متصوّر مع حد صورة من غير ما يستأذني إنه يتصوّر معاه؟
يعني إيه ياخد قرار في حاجة هيعملها من غير ما ياخد موافقتي؟
يعني إيه يصحى من النوم ويتكلم مع أي حد قبل ما يكلمني؟
يعني إيه يسمع ألبوم شيرين الجديد من غير ما نسمعه لأول مرة وإحنا سوا؟
يعني إيه يحب أغنية من غير ما نحبها سوا؟
يعني إيه يشتري هدوم جديدة من غير ما أنقيها له على ذوقي؟
يعني إيه يشوف صورة حد غيري ويعمل لها لايك؟
يعني إيه يبص لحد غيري ويعجبه؟
يعني إيه يحب حد غيري؟ يعني إيه يوحشه حد غيري؟ يعني إيه يفتقد حد غيري؟
عارف إن كل اللي فات دة "عادي" في قانونكم وإن "كله بيعدّي والحياة مابتقفش على حد".. يمكن عشان أنا مابالاقيش مشكلة في إني أعمل كل دة وبابقى مستعد أضحي بكل ما عندي بدون أي شروط فبأبقى منتظر نفس الشيء من اللي بأحبه وبأشوف إنه المفروض يبقى حب إحتلال متبادل و"مريح" للطرفين.. طب في قانونكم فهموني يعني إيه حد بعد ما يفارق حبيبه يحب غيره في أقل من أسبوع؟
إزاي عندكوا الواحد بيخرج من علاقة بيدخل في غيرها؟ إزاي بيقدر يتأقلم؟ إزاي بيقدر ينسى التفاصيل اللي جمعته بحبيبه الأولاني؟ طب إزاي مابيحسش بغليان من جواه لما بيتخيل التفاصيل دي بتحصل مع حد غيره جه بعديه؟ إزاي بكل سهولة بييجي له دور زهايمر بينسى بيه كل اللي عاشه زمان، ومابيحسش بلحظة شوق ولا لحظة ندم ولا لحظة حنين للي عدّى؟ وبيبدأ حياته من جديد، ويبقى واحد تاني ابن النهاردة، عشان "كله بيعدّي والحياة مابتقفش على حد"..---
"أول مرة أتمنى إن أنا يكون عندي زهايمر بجد، عشان أنسى اللي عملتوه فيا.." – من فيلم (زهايمر).