اهم الأخبار:

مقالات

أبانوب مرجان يكتب: "أنا هيثم أحمد ذكي..."

حريتنا - أبانوب مرجان يكتب: "أنا هيثم أحمد ذكي..."

 

مفيش حد في مصر ماتخضش لما سمع موضوع وفاة الشاب هيثم أحمد ذكي, والخضة الأكبر موضوع ربط وفاته بما يسمى "الوحدة", والحكايات اللي عمالة تتحكي من يوم وفاته للنهارده عن قد أيه هو وحيد, وقد أيه كان بيعاني من مرض نفسي خطير إسمه "الوحدة" ..

وللأسف ماحدش كان واخد باله من الحوار ده .. ده بالعكس ناس كتير كانت شايفه إن الراحل هو اللي مكبر الموضوع, ودايمًا كانوا بيقولوا "ياعم ما كلنا حواليك أهو" .. هو إنتوا صحيح موجودين بس موجودين إمتي؟ وبتعملوا أيه؟

المرض النفسي عزيزي القارئ بقي موجود في كل بيت زي التليفزيون والنيش كدة, مفيش شاب فيكي يا مصر مش بيعاني من مرض نفسي مُعين .. مفيش شاب في مصر ماكنش يوم من الأيام "هيثم أحمد ذكي" .. وأولهم أنا .. أنا لحد دلوقتي "هيثم أحمد ذكي" .. أنا هو في كل اللي كان حاسُه .. هو في طلباتُه .. ووجعُه ..  ده مش بس كدة .. ده في مننا كتير كمان .. وللأسف مش هنحلو غير لما نموت.

أنا بس كنت حابب أبعت رسالة لحبايبنا اللي بيقولوا وبيهاجموا الأمراض النفسية وعايز أقول فيها ..

"إنتوا عارفين في كام شاب مريض نفسي في مصر .. ؟

طب عارفين في كام شاب حياته إتدمرت حرفيًا؟

عارفين في كام نفس ضاعت بسبب مواقف عدوا بيها؟

عارفين في كام حلم إتهد وراح بسبب المرض النفسي؟

عارفين في كام واحد موبايلاتهم سايلنت ومابيردوش علي حد وخايفين علي طول؟

طب عارفين في كام شاب في مصر فقد الأمل في كل شئ حواليه؟

عارفين في كام شاب بيناموا قلوبهم موجوعة وحاسين إنها هتتخلع منهم بسبب الخوف؟ 

طب عارفين في كام شاب داخوا علي دكاترة الدنيا وماعندهومش حاجة .. بس برضه مش كويسين؟

عارفين إن في ناس كتير بتعاني من أمراض نفسية .. والدنيا فعلًا غيرتهم وبدلتهم وخلتهم ناس هما نفسهم مايعرفوش مين دول ؟؟ ..

للأسف بقي .. إن جزء كبير من السبب ورا الأمراض دي بنكون أنا وإنت .. أيوة "أنا وإنت" .. وده حصل لما قولنا كلمة بايخة وهزرنا هزار تقيل .. أو بسبب عدم أمانة في علاقة ما ..

 أو خازوق حصل وساهمنا فيه في الشغل .. أو بسبب سُمعة طلعناها علي حد وحياتُه  إتشقلبت بعدها .. أو بسبب مدير عيان في دماغه قرر يكفر موظفينُه .. أو قصة حب كانت قايمة علي المراهقة شوف ضاع كام واحد بعدها ..

خدوا بالكوا ياخوانا وأنا أولكوا .. من تعاملنا مع اللي حوالينا .. من كل كلمة طالعة .. من كل فعل بيتاخد ضد حد .. خدوا بالكوا لنكون بنخرب حياة حد وإحنا مش قاصدين .. "وراعوا ربنا في البشر" لنكون سبب في ضياع حد أو موته."

 


للاستماع للبث المباشر لراديو حريتنا اضغط هنا
للاشتراك في صفحتنا على الفيس بوك ومتابعة أخبارنا اضغط هنا
المصدر : خاص

اقرأ أيضا

تعليقات الموقع (0)

أضف تعليقك
الأسم
البريد الالكترونى
الهاتف المحمول
عنوان التعليق
التعليق
إرسال التعليق

تعليقات فيسبوك

حريتنا 2013 © جميع الحقوق محفوظة لدى موقع ( إحدى مواقع شركة LCA )