اهم الأخبار:

مقالات

أبانوب مرجان يكتب: عزيزتي حالتي النفسية..

حريتنا -  أبانوب مرجان يكتب: عزيزتي حالتي النفسية..

 

 

عزيزتي حالتي النفسية؛

 

صباح الفُل، سامحيني هتتقل عليكي شوية، وأنا عارف إنك دايمًا مشغولة، تلاقي بتفكري في حاجة أو زعلانة من حاجة، أنا بس محتاج أفضفض معاكي بكلمتين، بُصي يا بنت الناس إنتي عارفة إننا أكيد طريقنا واحد، فمش مستاهلة نكد من أي نوع ممكن؟

كُنت حابب أطلب منك تركزي شوية في حياتك معايا، وتستقري .. أه والله أصل الإستقرار ده مفيد ليا وليكي، إنما قلبة الوش وتقمص شخصية الزوجة المصرية دي، مش نافعة معايا خالص، ومش كل ما أسأل مالك؟ يترد عليا بمفيش ..

إزاي مفيش، وأنا علي طول متضايق ومخنوق، وكمان بقيت بتوتر من أصغر تفصيلة بتحصل، إزاي مفيش وإنتي علي طول صعبان عليكي نفسك؟

أنا عارف إنك برضه مستحملة كتير، وعارف كمان إن في شوية "ظروف" كدة هي السبب في كل العك ده، بس إحنا متعودين نعدّي، وندوس علي كل حاجة لجل مانبقي كويسين، وعلي فكرة أنا مش مهم عندي أنا أبقي كويس، المُهم إنتي .. فخليكي كويسة.

مش هَطول عليكي، بس دي آخر حاجة هطلُبها منك، ممكن تنسي اللي فات بكل تفاصيله، وتقتنعي إنه خلاص أصبح ماضي، ممكن كل اللي خرج من حياتك تدعيلُه بالخير وبس، وتعالي نبعد عن الكل، ونعمل حياه جديدة مليانة طاقة أمل، وفرح وأحلام وكلام من ده، نرجع تاني زي زمان.

أخيرًا أنا عارف إني طول الوقت باجي عليكي، بس عارف برضه إني مليش غيرك، ياريت لما أضعف وأعملك مشاكل تاني، تاخديني من إيدي وتوديني لربنا، علشان نرجع فرحانين زي كل مرة.


للاستماع للبث المباشر لراديو حريتنا اضغط هنا
للاشتراك في صفحتنا على الفيس بوك ومتابعة أخبارنا اضغط هنا
المصدر : خاص

اقرأ أيضا

تعليقات الموقع (0)

أضف تعليقك
الأسم
البريد الالكترونى
الهاتف المحمول
عنوان التعليق
التعليق
إرسال التعليق

تعليقات فيسبوك

حريتنا 2013 © جميع الحقوق محفوظة لدى موقع ( إحدى مواقع شركة LCA )