اهم الأخبار:

مقالات

إزاي ابوظ علاقتي بإبني !! بقلم أندرو مرجان

حريتنا - إزاي ابوظ علاقتي بإبني !! بقلم أندرو مرجان

 

من فترة كنت قاعد في مكان واستوقفني موقف كان بين أم وابنها اللي كان عمره تقريباً اربع سنين، والموقف كان إن الولد بيلعب فاغصب عنه وقّع الكوباية من علي الترابيزة، وطبعاً لما وقعت واتكسرت عملت صوت جامد، والناس ابتدوا يبصوا عليها، الأم حست بإحراج شديد راحت هوب ضاربة الولد قلم عمل صوت أكتر من الكوباية اللي اتكسرت، طبعاً الناس لسة بيبصوا، الولد حس بإحراج وفضل يعيط عياط هيستيري، اللي إستغربتله بقي في كل ده، إن أمه أبتدت تضربُه علي إيديه وعلي جسمه عشان يسكت ويبطل عياط !

ولحد دلوقتي بحاول الاقي تفسير ل ده مش لاقي !

علشان تربي إبنك تربية صح وما يطلعش مُعقد نفسي أو علي الأقل يطلع عادي إبعد عن الحاجات اللي هتقراها دلوقتي..

الضرب :

إوعي تضرب إبنك في مكان عام وتحسسه بالإحراج، ولا تضربه في مكان خاص، ولا تضربه أصلاً، لأن ببساطة جداً الضرب مش هيجيب نتيجة، وكمان هيحسسه بالإحراج وده هيوّلد عنده عقدة نفسية هتفضل معاه لحد ما يكبر. "إبني شخصية لطفلك".

النقد المستمر :

لما تقعد تقول لأبنك إنت فاشل، إنت عمرك ما هتنجح، الكلام ده مش بيحفزه، بالعكس خالص الكلام ده بيحبطه و هيوّلد عنده عقدة نفسية هتفضل معاه لحد ما يكبر.

"حفز إبنك بكلام إيجابي"

 

المقارنة :

المقارنة من أكتر الحاجات اللي بيستخدموها الأباء و الأمهات زي مثلاً "شُفت إبن خالك جاب كام، شُفت بنت خالتِك مؤدبة إزاي"

الكلام ده بيإذي نفسياً جداً وهيوّلد عنده عقدة نفسية هتفضل معاه لحد ما يكبر.

"ماتقارنش إبنك بحد تاني"

الأنا :

"يابني أنا طول عمري بطلع الأول، يابنتي أنا وأنا قدِك كنت بحضّر دكتوراه" لما تفضل تقول كدة لأبنك إنت كدة بترسملُه صورة في ذهنه إنك خارق ومن كوكب تاني !

 وده هيوّلد عنده عقدة نفسية هتفضل معاه لحد ما يكبر.

"ماتعظمش من نفسك قدام إبنك وفهمه إنك إنسان طبيعي"

المنّ والتعدد :

مش كل ما تشوف إبنك تقعد تقوله أنا بدفعلك قد كدة اقساط المدرسة، أنا بصرف عليك دروس قد كدة، أنا بأكلك، أنا باشربك !

السؤال هنا "إنت خلفت ليه ؟"

 و ده برضه هيوّلد عنده عقدة نفسية هتفضل معاه لحد ما يكبر.

"بلاش أنا بمنّ عليك، ممكن أنا بعمل كدة عشان بحبك وانت ابني"

التهديد :

"لو ماكلتش هحرقك بالولاعة، لو ماسمعتش الكلام هحطلك شطة علي لسانك"

الحاجات دي بتسبب خوف وبتتراكم داخل الطفل وهتوّلد عنده عقده نفسية هتفضل معاه لحد ما يكبر وبُكرة نندم.

"التهديد مع الأطفال مش آداة"

واخطر حاجة نفسياً وجسدياً هو إن الطفل ينام مضروب أو معيط !

ياريت أنت كأب وإنتِ كأم ماتعمليش الحاجات اللي فوق دي لأنها فعلاً خطر إنتِ المفروض تراعي شعور إبنِك، وأنت المفروض تكافئ إبنك، ولو إبنك إعتاد علي فعل سلوك مش كويس، الحل الوحيد هو إهمال السلوك ده وماتحسسهوش إنك واخد بالك وهو هيبطلُه مع الوقت.

والكلام ده بناءاً عن تجارب وابحاث علمية.

 المشاكل اللي ممكن تيجي مع العُقد النفسية من الحاجات اللي ذكرناها "التبوّل اللا إرادي"، و"الكوابيس"، و"الخوف"، وكمان "االسرقة" ومشاكل تانية كتير.!

ربّوا اولادكم تربية صحيحة، الفلوس والأكل والشرب مش كل حاجة.. وفي قاعدة ثابتة بتقول "عايز تبوظ علاقتك بإبنك "إضرب، زعق، قارن، اشتم، هدد".

 


للاستماع للبث المباشر لراديو حريتنا اضغط هنا
للاشتراك في صفحتنا على الفيس بوك ومتابعة أخبارنا اضغط هنا

اقرأ أيضا

تعليقات الموقع (0)

أضف تعليقك
الأسم
البريد الالكترونى
الهاتف المحمول
عنوان التعليق
التعليق
إرسال التعليق

تعليقات فيسبوك

الاكثر قراءة

حريتنا 2013 © جميع الحقوق محفوظة لدى موقع ( إحدى مواقع شركة LCA )