اهم الأخبار:

مقالات

بقلم أبانوب مرجان: هــشـش .!!

حريتنا - بقلم  أبانوب مرجان: هــشـش .!!

 

 

الحاجات الصعبة في حياتنا أصبحت أمر واقع ومابتنتهيش، والأزمات كل يوم تكتر عن اليوم اللي قبله والواحد بقي عنده اعتقاد شخصي إن دي أصعب أيام حياته، مع إنها المفروض يعني تكون أحلي أيامه، بس للأسف مش دايماً المفروض هو اللي بيكون ..

الصُداع الناتج عن وجود الحاجات دي في حياتنا مابقاش نافع له علاج، وعمال ينتشر في حياتنا كل يوم أكتر عن التاني والموضوع بيكبر، واللاستسلام بيقرب مع إنه جي من بعيد .!

في حقيقة الأمر الواحد مابقاش عارف يلاحق علي الصداع ده منين ولا منين، من المُجتمع اللي بقي فاكر نفسه هو الكل في الكل وبيعاملنا علي إننا شوية عيال صغيرة ولازم نعمل اللي هو عايزه ورجلينا فوق رقبيتنا مثلاَ وده بعد ما طلعلنا في المقدّر جديد بشوية عادات متخلفة زي:

 "قطر الجواز هيفوتك - الناس يقولوا علينا أيه - مايصحش كد ة - هتفشل - إلخ"

ولّا من شوية المُحبطين اللي ماورهمش أي حاجة غير إنهم يهدوٌا حيلك وحيل اللي جابوك حتي لمُجرد إنهم جابوك، ليل نهار يوقعوا فيك ويطربقوا عليك سقف أحلامك، ومش عجبهم العجب ده لو ماعترضوش أصلاَ علي كلمة عجب من الأول.

ولّا من الأحداث والإرهاب والتفجير وأخبار القتلى والتليفزيون اللي بقي بيجي عليه "نعي" أكتر من مابيجي عليه بيومي فؤاد، كمية الدم اللي بقت مطرطشة علينا في كل حتى، وكمية التفاصيل اللي بتثبت بس إن العالم يا عيني بقي بيعاني من نقص حاد في الإنسانية.!

أساساً في ناس ماضيها البايخ لوحده كفيل يعملها صُداع لمدة 20 سنة قدام، وصُداع مُزمن كمان وده بسبب علاقتها الفاشلة أو اختياراتها الغلط أو حتى انبهارها بحاجات ماكنش ليها أي تلاتين لازمة .. ده غير بقي الغلى والتحرش والزحمة والنفسنة والفشخرة الكدابة ومديري اللي بيزعق بس والباقة اللي بتخلص كل خمس أيام وحاجات تانية كتير والله حرفياً قرفتنا يعني !!

الغريب في الموضوع إن وسط كل ده مطلوب منك تكون كويس، لأ وأيه مش كويس بس، ده إنت كويس وتتعامل كأن مفيش حاجة أصلاَ ..

أنا عارف إنها مُعادلة صعبة لكن بعد معاناة كبيرة مع الصُداع الرخم ده قدرت أوصل لحاجة سحرية اسمها "هــشش"..

 جرب كده تسكِت الحاجات العبيطة دي وتتعامل معاها علي إنها دبانة مثلاً أو عيل صغير ممكن تلهيه بأي حاجة عُقبال ماتخلص اللي وراك..

 

وكمل وعافر وعدي، وإجبر الصُداع على إنه يخف غصب عنه بنجاحك وشغلك، وثقتك في ربنا اللي المفروض ماتنتهيش وأي حد من الناس دي يستمر في إنه يقرفك قولَه "هـشش" وأمسكه من إيده ووريه الصح وإكسب فيه ثواب وإلهيه في ضحكتك وطاقتك الإيجابية.

 


للاستماع للبث المباشر لراديو حريتنا اضغط هنا
للاشتراك في صفحتنا على الفيس بوك ومتابعة أخبارنا اضغط هنا

اقرأ أيضا

تعليقات الموقع (0)

أضف تعليقك
الأسم
البريد الالكترونى
الهاتف المحمول
عنوان التعليق
التعليق
إرسال التعليق

تعليقات فيسبوك

حريتنا 2013 © جميع الحقوق محفوظة لدى موقع ( إحدى مواقع شركة LCA )