اهم الأخبار:

آكتب

"جدو عبده.."

حريتنا - "جدو عبده.."

 

 

كتب :  أبانوب مرجان

 

يوم الخميس اللي بعد تعب أسبوع طويل في المدرسة، وليلة العيد وهو أول الحاضرين والفرحانين بيه، مع سد الإحتياج لحاجة نفسك فيها ..!!

 

دول أكتر تلت معاني حقيقيين لكلمة "جدو عبده" بشكل خاص، ولكلمة الجد بشكل عام ..

 

ببساطة الجد هو أكتر حد بيحقق معنى كلمة سند موجود في حياتك بدون ماتاخد بالك، إحساس غريب بالطمأنينة وإنت كلّك ثقة إن أبوك أبوه موجود ..!!

 

من كام يوم إتفاجئت بأمي بتقولي، جدك عيان، وياريت لو تسأل عليه.. فعلاً طلعت علشان أطمن عليه، لكن وسط كل ده كان في مفاجأة تانية ..

 

إزاي ممكن حد يكون محبوب كدة وبالشكل ده؟

 

ياتري عمل أيه في حياته يخليه يتمتع بكل الحب ده؟

 

ومفضلش في ذهني غير سؤال واحد بس .. إزاي أبقي جدو عبده؟

 

إزاي يجي عليا اليوم اللي هبقي فيه عيان وكل الناس "مخضوضة" عليا كدة .. وإمتي أوصل لدرجة الرضا اللي باينة جوة عينه دي ؟

 

 

 

علي قد ما كنت زعلان علي تعب جدي، علي قد ما كنت زعلان أكتر علي حياتي اللي شبه بتروح.. بتروح من غير ما أكوّن صداقات حقيقية، أو أعمل ناس تخاف عليا بجد، لما تشوفني تعبان وأحس بقلبهم وهو قلقان عليا أوي كدة ..

 

إزاي بيتي يكون مفتوح حتي وأنا تعبان، والكل بياخد واجبه، إزاي أسيب حكايتي تعلّم مع كل اللي عرفوني، وإزاي جدو عبده ماحولش يخش في أي معارك بشرية ملهاش أي تلاتين لازمة؟

 

جدو اللي فضل عُمره كله معندوش أي هدف غير إنه يقرب من ربنا، ويقرب كل اللي يعرفهم برضه من ربنا، ليا معاه ألف حكاية وحكاية ..

 

وحكاية جدو عبده معايا حكاية غريبة، يمكن علشان هو كبير العيلة اللي بحبها، أو يمكن علشان هو ساعدني في حاجات كتير، لكن حكايتي معاه كبرت أكتر وأكتر لما إتعلمت منه حاجات وهو عيان، وعرفت إن مش صعب تكون إنسان صالح، وتعرف تفيد الناس بكلامك، وتعرف كمان تفيدهم وإنت ساكت ..

 

شفاك الله يا جدو.!!

 

 


للاستماع للبث المباشر لراديو حريتنا اضغط هنا
للاشتراك في صفحتنا على الفيس بوك ومتابعة أخبارنا اضغط هنا

اقرأ أيضا

تعليقات الموقع (0)

أضف تعليقك
الأسم
البريد الالكترونى
الهاتف المحمول
عنوان التعليق
التعليق
إرسال التعليق

تعليقات فيسبوك

حريتنا 2013 © جميع الحقوق محفوظة لدى موقع ( إحدى مواقع شركة LCA )