اهم الأخبار:

آكتب

عمر الإبياري يكتب: خيرات رمضان

حريتنا - عمر الإبياري يكتب: خيرات رمضان

رمضان كريم وكل سنة وكلكوا طيبين.. النهاردة تالت يوم في رمضان والواحد بيبقى مصدع ومهبًط علشان لسة ما اتعودش على الصيام.. ودايماً مع بداية الشهر الكريم كل سنة بنسمع في كل حتة شوية أغاني كدة اتعودنا نسمعهم من وإحنا صغيرين إحتفالاً بقدوم شهر رمضان المعظم.. وبالرغم إن فيه عشرات الأغاني اللي بتحتفل بشهر رمضان إلا إن كام أغنية بس هما الأشهر واللي مسيطرين على الساحة من سنين..
أشهر أغاني شهر رمضان على الإطلاق هي أغنية "رمضان جانا" واللي غناها المطرب محمد عبد المطلب وكتب كلماتها حسين طنطاوي ولحنها محمود الشريف، وأكتر حاجة خللت الأغنية دي تعلّق مع الناس هو لحنها اللي اتعمل ساوندتراك لكل بروموهات مسلسلات رمضان المعروضة في كل قنوات التليفزيون خلال الشهر الكريم، واللي خللانا أول ما نسمع بس الموسيقى دي نحس إن رمضان جِه حتى لو سمعناها في شهر ذي القعدة..
https://www.youtube.com/watch?v=AG2NQZiZWlo
تاني أكتر أغنية من أغاني رمضان علقت مع الناس هي أغنية "أهوه جِه يا ولاد"، واللي غناها الثلاثي المرح، ودي فرقة شهيرة ظهرت في الخمسينيات وتميزت بغناء الأغاني الإجتماعية الخفيفة وتكونت من ثلاثة بنات من خريجي معهد الموسيقى العربية وهن وفاء محمد مصطفى وصفاء يوسف لطفي وسناء الباروني (شقيقة الممثلة الكوميدية سهير الباروني)، وكتبت كلمات الأغنية نبيلة قنديل ولحنها علي إسماعيل.
https://www.youtube.com/watch?v=M0MKydakTqE
ومن أغاني رمضان اللي الناس حبوها كمان أغنية "حالو يا حالو" اللي غنتها الشحرورة صباح، وكتب كلماتها محمد حلاوة ولحنها محمد الموجي، ومن الذكريات المتعلقة بالأغنية دي إنها اتعملت في أول رمضان يعدي على مصر بعد رحيل الملك فاروق وتحويل مصر من ملكية إلى جمهورية، ودة اللي خللى محمد حلاوة يوضح النقطة دي في كلمات الأغنية اللي غنتها صباح لما كانت بتتك أوي على جملة ((لياليك الحلوة الزينة ع "الجمهورية" هلُّوا)).
https://www.youtube.com/watch?v=iKIwDTukm9Q
ومن الأغاني اللي اتغنت لشهر رمضان وكانت مشهورة أوي وقت إنتاجها لكن اتنست مع مرور الزمن هي أغنية "خيرات رمضان" اللي غناها ملك الكوميديا الفنان إسماعيل يس -آه والله إسماعيل يس غنى لرمضان- وكتب كلمات الأغنية موليير الشرق أبو السعود الإبياري ولحنها عزت الجاهلي.
https://www.youtube.com/watch?v=GjSgcTwRrBE
وأكيد ما نقدرش ننسى إستعراضات أستاذ الكوميديا فؤاد المهندس اللي عملها بمناسبة شهر رمضان، وكان أولهم دويتو "الراجل دة هيجنني" مع الشحرورة صباح، واللي كان في فيلم "القاهرة في الليل" إنتاج عام 1963، واللي لحد النهاردة مش بيعدي علينا رمضان غير لما نفتكره ويضحكنا.
https://www.youtube.com/watch?v=h-T2GgjQptM
أما الإستعراض التاني هو "الصايم مش كدة" وكان دويتو بين فؤاد المهندس وشويكار واللي اتصور بطريقة (الفيديو كليب) مخصوص إحتفالاً بقدوم الشهر الكريم، وكان كم كلمات حسين السيد وألحان حلمي بكر.
https://www.youtube.com/watch?v=O7X4DwkSgC8
----
رمضان كريم smile emoticon


للاستماع للبث المباشر لراديو حريتنا اضغط هنا
للاشتراك في صفحتنا على الفيس بوك ومتابعة أخبارنا اضغط هنا
المصدر : حريتنا

اقرأ أيضا

تعليقات الموقع (0)

أضف تعليقك
الأسم
البريد الالكترونى
الهاتف المحمول
عنوان التعليق
التعليق
إرسال التعليق

تعليقات فيسبوك

حريتنا 2013 © جميع الحقوق محفوظة لدى موقع ( إحدى مواقع شركة LCA )